CEBU, Philippines - Kapin sa P40 mil nga koleksyon ug halin ang nasakiyo sa duha ka nagmotorsiklong tulisan sa ahente og bino samtang ni-parking sa iyang delivery van sa barangay Guiwanon lungsod sa Argao niadtong Lunes sa ala 1:10 sa hapon.
Ang biktima mao si Richard Saquilon, 34, nagpuyo sa barangay Tulic lungsod sa Argao ug driver salesman sa Tritzland Commercial nga gipanag-iya sa usa ka Samuel Torres nahimutang sa barangay Tulic nga distributor sa mga ilimnong makahubog.
Matud ni PO2 Benjamen Gerozaga, desk officer sa Argao Police dihang nahinabi sa Banat News subay sa imbestigasyon ang biktima kauban sa iyang duha ka truck boy nga diha sa luyo sa delivery van mi-parking sa daplin sa highway sa maong lugar aron mopahuway.
Ang biktima nga naglingkod sa frontseat kalit lang gihunongan sa duha ka tulisan nga nagsuot og close-type helmet ug nag- jacket ug sakay sa kolor itom nga motorsiklo.
Walay nahimo ang biktima dihang gitionan og armas ingon man ang duha ka truckboy niini tungod kay armado sad ang backup hinungdan nga gitugyan niini ang P40,350 mil nga koleksyon ug halin nila niadtong higayuna.
Ang mga tulisan miikyas padulong sa direksyon sa lungsod sa Dalaguete samtang midangop sa kapolisan ang mga biktima. - BANAT NEWS