Jailguard gi-hostage

CEBU, Philippines - Gi-hostage sulod sa pansayan ang usa ka jail officer sa kapin usa ka gatos nga mga batang menor de edad nga gi-rehabilitate sa Operation Second Chance nga nahimutang sa barangay Kalunasan sa miaging gabii nga miresulta sa tensyon.

Milanat og dul-an tulo ka oras nga natanggong sulod sa pansayan ang maong jail officer una pa gipagawas sa mga minor offenders human sa dinaliang kasabotan tali sa babayeng jail warden nga si Jail Warden Sr. Insp. Elsie Eireen Alcomendras.

Ang 170 ka mga batang lalaki diha sa Operation Second Chance mireklamo ngadto sa luyo-luyong hepe sa Bureau of Jail Management and Penology (BJMP)-7 nga si Supt. Efren Nemeño kalabot sa giingong pagpangulata kanila sa walo ka mga jailguards.

Ang walo nag-atubang karon og imbestigasyon apan wala sila hinganli sa BJMP. Wala usab matino kung usa sa gireklamo ang gi-hostage nga nagranggo og Jail Officer One.

Si Chief Supt. Deogracias Carreon Tapayan pangulo sa BJMP nga nahinabi sa Banat News nagkanayon nga miulbo ang tensyon alas 11:45 sa miaging gabii.

Matud pa niini gipahigayon ang ‘bilang’ sa 3rd shift jailguards sa mga batang gi-rehab apan sa kalit miulbo ang tensyon dihang usa sa mga jailguard ang gitabangan og guroy sa mga bata ug gipaslak sa kasilyas.

Gibana-banang 160 ka mga batang lalaki ang mihimo niini gikan sa 175 ka mga minor offenders sa maong pasilidad nga diin lima ang mga babaye.

Matud pa atol sa negosasyon tali ni Alcomendras adunay gisumitir nga mga pangalan ang mga minor offenders sa walo ka mga ‘dagmalang’ jailguards nga buot nilang pailisan.

“Nagkagulo na sa loob, ayaw palabasin ‘yung isang jail guard kay may alleged na pananakit sa kanila ang walo na jail officers,” asoy pang Tapayan.

Si Tapayan nagkanayon nga ilang establisahon kun duna ba gyuy pagpangulata nga nahitabo ug kun mapamatud-an ilahang pasakaan og kasong kriminal ug administratiba ang maong mga gwardiya.

Matud ni Tapayan nga seryoso ang pasangil nga pagpangulata ilabi na mga bata ang mga biktima.

Gawas nga pailisan ang walo ka jailguards mihangyo usab ang mga bata nga wala nay limit ang visiting hours sa ilang mga ginikanan gikan sa Lunes hangtud sa Biyernes ug hunongon na ang pagpabalhinbalhin kanila og laing mga detention cell.

Human sa tulo ka oras gibuhian pagka alas-2 kagahapon sa kaadlawon ang jailguard. Wala hinuon masuta kung armado ba ang mga minor offenders o kun nasakitan ang maong jailguard.

Gipasalig ni Tapayan ngadto sa mga ginikanan sa 175 ka minor offenders nga walay mahitabong pagpangulata sa ilang mga anak sa maong pasilidad.

Si Alcomendras nga nahinabi sa Banat News nagkanayon nga daghang mga yangungo ang mga menor de edad apan tulo lang niini ang labing importante.

Usa sa giingong hinungdan sa pagreklamo sa mga bata mao ang pagpabalhin ngadto sa laing selda sa usa sa mga inmate nga nag-edad na og 18-anyos.

“Ang amo gud nga among ibalhin ang 18-anyos nganhi kay dili mi gusto nga makaimpluwensya sila sa 18-anyos paubos didto sa pikas kay giipon raman na sila, pero hugot silang misupak kay gilain nila pagsabot,” sumala pa ni Alcomendras.

Lima ka minor offenders nga nangatkat sa kural ug nanawag sa mga tigbalita nga padulong nang mogawas sa pasilidad ang subling mipadayag nga gikulata sila sa walo ka jailguards ug kinahanglang mailisan kini apan ipabilin ang kasamtangang jailwarden.

Si Mayor Michael Rama mimando na sa Police Coordinating and Advisory Council nga mohimo og dinaliang imbestigasyon kalabot sa maong insidente.

Gitinguha usab ni Rama nga makakuha og kopya sa mga pamaagi sa nahisgutang prisohan aron masuta kung unsa pa ang angayan nga idugang nga mga butang aron mapalapad ang kahapsay ug kalinaw.

Ang presiding officer sa PCAC nga si Eugene Elizalde nagkanayon nga dili pa siya kumbinsido sa report nga dunay jail officer nga mangdagmal og piniriso sanglit mihimo sila og inspekyon sa maong prisohan dili lang dugay ug wala sila’y nakita nga senyales niini.

Hinuon gipasalig ni Elizalde nga magpadayon gihapon ang ilang imbestigasyon niini gumikan sa bag-ong nadawat nila nga report. - Uban sa report ni Sanden Anadia/EIM (BANAT NEWS)