CEBU, Philippines - Human mohugpa ang sakit nga tipos sa lungsod sa Tuburan sa milabay’ng semana sila si Governor Gwendolyn Garcia ug ang igsoon niini nga si Kongresista Pablo John Garcia sa 3rd district mipadala gilayon og 8 ka multicab ngadto sa walo ka mga barangay sa maong lungsod.
Ang nakadawat sa maong mga sakyanan mao ang mga barangay Caridad; Kalangahan; Kansi; Gaang; Mag-alwa; Montealegre; Siotes ug Tomugpa.
Gawas sa mga multicab, nanghatag usab sila og tag-napulo ka kilong bugas humay ug tag 12 ka linatang sardinas ngadto sa dul-an usa ka libo ka mga pamilya nga naigo sa sakit nga tipos .
Ang gobernador ug ang kongresista uban sila si Provincial Board Member Alex Binghay ug Ian Zambo, Toledo Mayor Rudy Espinoza; Asturias Mayor Alan Adlawan; Toledo Vice mayor Arlene Zambo ug Asturias Vice Mayor Joel Dumdum kinsa mihatag usab sa ilang hinabang ug moral support alang sa mga pamilya nga natakboyan sa maong sakit.
Ang gobernador ug ang kongresista mipaabot sa ilang kinasing- kasing nga mensahe alang sa mga nabiktima sa maong sakit.
Gawas sa multicab ug relief goods, gitunol usab sa gobernador ang tabang financial nga P5 mil ug laing P5 mil gikan ni Congressman Pablo John Garcia alang sa matag usa sa upat ka banay nga nawad-an og minahal sa kinabuhi gumikan sa tipos.
Samtang si Toledo Mayor Rudy Espinoza mitunol usab og P200 mil nga hinabang financial alang sa lungsod sa Tuburan ug ang usa ka libong binotelyang mineral water.
Gumikan sa kadaghang mga gasa nga ilang nadawat, mapasalamaton kaayo si Tuburan mayor Democreto Diamante.
Samtang gipaabot usab ni kapitan Eleanor Ondoy sa barangay Caridad ang iyang pasalamat ngadto sa gobernador sa hatag niining multicab nga matud niya magamit kaayo sa iyang barangay ilabi na sa panahon nga adunay emerhensiya.
Human sa kalihokan sa Tuburan Sports Complex giduaw pagbalik sa inahan sa gobernador ug mga kaubanan ang mga biktima sa sakit nga tipos didto sa tambalanan.(WC) (BANATNEWS)