Mayor Durano mokiha sa 2 konsehal

CEBU, Philippines - Nagplano ang kampo ni Danao Mayor Ramon Durano nga mopasaka og kaso batok sa duha ka konsehal sa maong syudad nga namasangil kaniyang maoy utok sa pagkasunog sa Comelec Office niadtong Enero 30 ning tuiga. Atol sa gihimong press conference sa buhatan sa mayor kagahapong adlawa, si Durano mibutyag nga mosang-at siya og kaso batok ni konsehal Jose Thaddeus Roble ug laing usa ka konsehal kansang pangalan gipugngan hangtud di kakuhaan og habig.

Matud pa ni Durano nga base sa iyang nasayran ang duha ka konsehal mihingalan ngadto kaniya nga maoy utok sa maong sunog tungod daw kay kahadlok kini sa recall election nga giplano sa pikas kampo.

“Duna man guy report nga ang tanan kunong gibuhat diha nga sunog-sunog sa Comelec gipahid nila nako... ako kunoy author sa pagsunog sa Comelec kay hadlok kuno ko’g recall,” matud pa ni Durano.

Ang legal counsel ni Durano nga si Atty. Gloria Dalawampu mibutyag nga ang ilang paninguhaon karung semanaha masang-at ang maong kaso ug karon ilaha pang gikompleto ang mga dokumento sa kasong libelo batok sa duha ka konsehal.

Gihulagway ni Dalawampu nga ang gihimo sa duha ka konsehal usa ka libelous acts kini tungod kay namasangil sila nga walay igong basihan.

“It is unfair, nakahatag sila og pagdaot sa mayor. It’s libel atong sayohon mentras di pa ma criminalized ang libel,” pasabot pa ni Dalawampu.

Samtang sa pakighinabi sa Banat News ni Konsehal Roble mibutyag kini nga ilang girespetuhon ang desisyon sa mayor apan kun mapamatud-an nga walay kamatuoran ang ilang gisang-at nga kaso sila usab adunay katungod nga mosumbalik sa pagpasaka og kaso batok sa kampo sa mayor.

“We respect his rights, katungod man na niya, if ever pud they cannot prove it, we will do the same. They also have to respect us if ever they cannot prove it,” pasabot pa ni Roble.

Gisuwayan unta sa pagkuha ang habig sa laing konsehal apan ang staff niini miingon nga di kini makontak tungod kay atoa kini sa kaulohan.

Niadtong Enero 30 kalit miulbo ang sunog sa computer room sa Comelec Office sa Danao apan maayo nalang nga dali kining napalong sa mga bombero, nasuta sa imbestigasyon nga electrical misuse ang hinungdan sa maong sunog kini tungod sa uninterruptible power supply (UPS) nga walay ibot-ibot sa saksakanan.

Apan tungod sa maong sunog napasanginlang si Mayor Durano nga maoy utok niini butang nga iyang gihimakak. (BANATNEWS)