CEBU, Philippines - Kritikal nga kahimtang sa usa ka security guard human kini pusila sa duha ka wala hiilhing kriminal didto sa barangay Cansumoroy, lungsod sa Balamban kagahapon sa lapas sa tungang gabii.
Ang biktima nailhan nga si Roseller Labrador, 33, gwardiya sa CIPDE Rafi Jobsite nga nahimutang usab sa maong lugar.
Sa pakighinabi sa Banat News ni PO1 Johnrell Romero, sa Balamban Police Station, kini mibutyag nga ang biktima paatubang na untang mouli sa ilang balay gikan sa iyang trabaho nga nagsakay sa iyang motorsiklo.
Apan samtang nagdagan, kalit lang mibabag sa karsada ang duha ka tawo busa mihunong siya.
Walay pupangutana kalit siyang gitabangan og pusil busa wala kini makalikay sa mga bala hangtod nga natumba ug naligid siya sa karsada kay nabulit sa samad pinusilan ang iyang lawas.
Bisan samaron mibawos siya sa pagpamusil sa namanhig kaniya apan danag nalang kay wala nay umoy ang iyang kamot busa wala siya makaigo.
Ang mga nakasaksi sa maong hitabo maoy mihatod sa biktima sa tambalanan sa dakbayan sa Sugbo.
Napunitan sa kapolisan sa crime scene ang upat ka kabhang sa kalibre .45, usa usab ka buhing bala sa maong armas ug usa ka unit nga handheld radio nga gipanag-iya sa biktima.
Gibutyag usab ni Romero nga posibling ang mga natang-tang nga trabahante sa CIPDE kinsa gipasanginlang mga kawatan nga nasikop dili pa dugay sa biktima maoy mibanhig sa naulahi.
“Base sa estorya sa mga tawo, daghan kaayong mga trabahante nga natangtang unya siya’y (biktima) maoy giinitan kay siya may nakadakop kay nangawat lagi kuno ang maong mga trabahante”, matud pa ni Romero.
Kasamtangang nagpaayo ang biktima sa usa sa mga tambalanan sa ning dakbayan sa Sugbo. - BANAT NEWS