CEBU, Philippines - Patay ang usa ka lalaki human kini mabangga sa usa ka traysikol pasado alas- 8 sa miaging gabii sa national highway sa barangay Abucayan lungsod sa Balamban.
Ang biktima nailhan nga si Antonio Ceniza, 40, molupyo sa barangay Buanoy sa maong lungsod. Sa pakighinabi sa Banat News ni Johnrell Romero sa Balamban Police Station mibutyag kini nga ang biktima sakay sa iyang motorsiklo nga wala pay plaka apan may nakabutang nga ‘for registration’ dihang nahitabo ang aksidente.
Samtang nagbiyahi ang biktima patubang sa habagatang bahin sa maong lungsod gikasugat niini ang traysikol nga gimaneho ni Jover Sebellana Rivera.
Matud pa ni Romero nga base sa gibutyag ni Rivera nga samtang nagpadulong ang biktima ngadto kaniya iyang nakita nga nag-ekis-ekis na ang dagan sa motorsiklo niini.
Hangtud nga dihang nagkaduol na sila napunta ang biktima sa pikas lane ug diretso sa traysikol ni Rivera. Sumala pa nga nagtuo nianang una si Rivera nga dunay angkas si Romero nga nagbinuang maong nagpa-ekis-ekis ang dagan niini. - BANAT NEWS