Mga impluwensyadong tawo mosuporta ni Rama

CEBU, Philippines - Gibutyag ni Konsehal Joey Daluz nga dunay mga impluwensyadong personalidad sa Sugbo ang misaad nga mosuporta sa politikanhong karera ni Mayor Michael Rama sa pinilay karong 2013.

Si Daluz kinsa naa na sa last term sa iyang pagka-konsehal mipadayag nga duna na sila'y mga dagkong tawo sa natad sa politika aron motabang kang Rama apan nagdumili siya paghingalan kanila.

Matud pa sa konsehal nga naa sa trabaho ang iyang konsentrasyon karong panahona ug iyang gipasalig nga dili maapektohan ang pag-umol og serbisyo ngadto sa katawhan bisan pa man nga dili na tanang sakop sa konseho ang ubos sa Bando Osmeña Pundok Kauswagan nga gipangulohan sa karibal ni Rama sa politika nga si Kongresista Tomas Osmeña.

Si Rama una na nga misaysay nga bisan pa man sa report nga dunay mga kapitan nga dili mosuporta kaniya dili gihapon siya magdumot kanila ug padayong makatagamtam og proyekto gikan sa City Hall ang ilang barangay.

Kahinumduman nga misamot ang kisaw sa politika sa siyudad human gipahibalo ni Rama ang alyansa nila sa kanhi kongresista Antonio “Tony” Cuenco sa habagatang distrito sa siyudad sa Sugbo nga kanhi sakop sa BOPK nga modagan ilawom sa ilang tiket pagka-kongresista pag-usab.

Samtang aduna na usab silay iatbang kang Kongresista Cutie del Mar sa north district.

Ang line-up ni Rama sa pagkakonsehal naglangkob sa mga beteranong kanhi mga konsehal sa dakbayan samtang ang uban mga incumbent nga kapitan sa barangay ug ang uban naggikan sa pribadong sektor.

Pipila na usab sa mga opposition leaders ang mipadayag na sa ilang suporta ngadto kang Rama .  (BANATNEWS)