"Killer" sa negosyante nakaeskapo

CEBU, Philippines - Nakaeskapo ang pinirisong suspek sa pagpanulis ug pagpatay sa negosyante og hardware sa Toledo City human kini nakaambak sa patrol car samtang paingon nang ibalhin ngadto sa Toledo City Jail human mapasakai og kaso diha sa korte niadtong Biyernes.

Sumala pa sa report nakaposas pa ang duha ka kamot dihang milayat sa nagdagan nga patrol car si Levi James Villanueva pag-abot sa S. Osmeña St.,sa barangay Luray siyudad sa Toledo alas 4:20 sa hapon niadtong Biyernes.

Si Villanueva maoy suspek sa pagtulis ug pagpatay sa negosyanteng si Maria Belen Santillan nga tag-iya sa Santillan Enterprises sa Don Andres Soriano (DAS) Toledo duha ka semana na ang nilabay.

Matud ni SPO1 Joel Tadique sa Toledo City Police dihang nahinabi sa Banat News gikuyogan sa mga polis nga sila si PO3 Ceilo Quimat ug PO2 Jonathan Buscato sa Provincial Intelligence and Investigation Branch (PIIB) ang suspek gikan sa korte ug ipaslak na unta kini sa bilanggoan.

Matud sa report una pa unta dad-on sa bilanggoan si Villanueva ihapit pa unta kini ngadto sa City Health Office sa Toledo City aron mahiling kung mahimo ba kining ibutang sa prisohan apan kalit king milayat ug misulod sa kabalayan.

Bisan giposasan ang duha ka kamot ug gigukod sa mga polis wala na kini maapsi pa. Nasuta nga daghang mga paryente ang suspek sa maong lugar ug gidudahang may mitabang niini aron makatago. (BANATNEWS)