Tulo napaig

CEBU, Philippines - Tulo ka tawo ang napaig ug tulo usab ang naangol sa ikaduhang dakong sunog nga miigo sa dakbayan sa Sugbu sulod sa duha ka adlaw ug ning tungora diha kini nahitabo sa sitio Lusimba sa barangay Pardo ning dakbayan pasado alas-9 sa buntag kagahapon.

Matud pa ni SFO1 Fernando Ouano nga nahinabi sa Banat News nga ang kompirmadong namatay mao silang Esperanza Aberian, 75, nga gihulagway nga maglisod na og lakaw; Rosalie Tagacanaw, 35, ug ang gibantayan niining pag-umangkon niini nga si Rafael Dolalla, 5. Ang manag-iyaan nagkuptanay pa sa ilang mga kamot dihang napalgan ang ilang napaig nga lawas sa kabomberohan.

Nangaangol mao silang Justo Tagacawan, 25, Raymund Wayne Dolalla, 7-anyos ug Ralph Lawrence Dolalla nga mga kabanay sa nakalas.

Ang maong sunog miigo ngadto sa 2nd alarm diin gibanabanang adunay 22 ka mga panimalay ang naugdaw ug tulo niini ang partially burned lang. Gibanabanang mokabat sa P300 mil ang danyos sa maong sunog nga ang mga balay ginama sa mixed materials.

Matud pa ni Fire Marshall Aderson Comar nga base sa ilang inisyal nga pakisayod ang maong sunog nagsugod sa panimalay ni Jeffrey Tagacanaw sulod sa usa ka compound diin kaniadto usa ka rattan factory ug kasamtangan nga usa ka autoshop.

Gihulagway ni Comar nga hagip-ot ang dalan hinungdan nga duha ka mga access roads ang ilang gigamit aron malibotan ang lugar nga nasunog ug dili makatapon. Wala pa masuta sa kabomberohan ang hinungdan sa maong sunog apan gipahinumdoman ni Comar ang publiko nga magmatngon kontra sunog.

“Mao nay mga kakulian nga dili nato kapugngan, naa rana sa tagtungod sa balay ang pagprotehir sa ilang kaugalingon. So, atong balikon sa pag-awhag sa atong kaigsuonan nga Everyday is a Fire Prevention Day,” matud pa ni Comar.

Butyag usab ni Comar nga andam silang motubag sa mga hangyo sa kabarangayan kun ugaling aduna kini hangyo nga mopahigayon og fire drills.

Ang sunog kagahapon maoy ika-walong sunog nga miigo sa Cebu City karong bulana. Niadtong Biyernes gilamoy ang dul-an 100 ka balay sa sitio Tagutungan sa barangay Suba nga midanyos og P1.1 milyones ug tulo ang naangol. (BANATNEWS)