Gipusil likod sa police station
CEBU, Philippines - Usa ka lalaki nga gipasanginlang kawatan ug tulisan gipusil angol sa likod sa Carbon Police Station sa Quezon Boulevard sa barangay Ermita ning dakbayan sa Sugbo kagahapon sa kaadlawon.
Ang biktima nailhan nga si Juncel Misa, 28, taga Barangay Duljo, Fatima ning dakbayan sa Sugbo, samtang ang suspek nailhan lang sa ngalang Agao.
Si Senior Inspector Jul Mohammad Jamiri, hepe sa Homicide Section sa Cebu City Police Office (CCPO) nagkanayon nga ang motibo sa pagpamusil posibling may kalambigitan sa kasong pagpangawat sa biktima.
Sa pasiunang imbestigasyon sa kapolisan nasayran nga ang biktima gitawag sa suspek ug sa pagduol niini may gitunol kining kuwarta ngadto sa suspek apan pagkahuman gipusil kini ug naigo sa nawong apan ang bala milapos sa tingkoy.
Human matumba sa yuta, gibiyaan kini sa kriminal kinsa misakay dayon sa nagpaabot kaniyang motorsiklo dayong pahilayo sa maong lugar.
Ang mga tanod sa lugar daling mihatod sa biktima ngadto sa Cebu City Medical Center (CCMC) samtang padayon pang gipangita sa kapolisan ang suspek.
- Latest
- Trending
