CEBU, Philippines - Gipasalig ni Mayor Michael Rama nga dili maapektohan ang alokasyon sa mga gasolina alang sa mga sakyanan sa barangay bisan pa man sa walay hunong karon nga pagtaas sa presyo sa gasolina.
Nasayran nga moabot na ngadto sa P2.70 matag litro ang pagsaka sa gasolina sa pagsulod pa lang daan sa tuig 2012 samtang P0.80 lang ang nahitabong rollback.
Kahinumduman nga sa tuig 2011, 44 na ka higayon nga misaka ang presyo sa gasolina nga moabot na ngadto sa P11.00 samtang ang LPG misaka og P99.00 matag tanke.
Nagkanayon si Rama nga imentinar gihapon ang pag-apod apod og gasolina sa mga kabarangayan sanglit mao man kini ang gigamit sa ilang mga garbage trucks, patrol cars ug uban pang sakyanan nga gamiton panahon sa emerhensya.
‘Dili gyud na nato isakripisyo ang mga panginahanglanon sa barangay. Kung nimahal ang gasolina, mao gihapon ang madawat nila nga gidaghanon sa gasolina,” matud pa sa mayor.
Matag barangay adunay alokasyon nga gasolina gikan sa siyudad ug ang sukod niini mag-agad sa gidaghanon sa sakyanan sa ilang dapit.
Gitataw sa mayor nga makaapekto gyud sa ekonomiya ang pagsaka sa presyo sa gasolina apan ang importante sa usa ka local government unit nga dunay mga aksyon sa pag-atubang niini.
Iyaha na hinuon nga gitugyanan si City Administrator Jose Marie Poblete ingon man usab ang buhatan sa Budget Office nga sigurohong dili magkulang panginahanglan sa petrolyo sa siyudad. - BANAT NEWS