Di pa si Digal ang hulip kang Gillamac

CEBU, Philippines - Nahingangha kaayo si Mayor Jonas Cortes sa mitumaw nga mga taho nga si   kanhi direktor sa Cebu Provincial Police Office (CPPO) nga si Senior Superintendent Erson Digal maoy mohulip kang Senior Superintendent Noel Gillamac sa Mandaue City Police Office.

Si Mayor Cortes nga nahinabi sa mga tigbalita sa press conference nga gipahigayon niadtong miaging adlaw mipadayag nga kasamtangan pa niyang gipaabot ang listahan sa mga pangalan sa mga opisyal sa kapolisan nga maoy iyang pilian nga ihulip kang Gillamac.

Matud pa niya nga ang pagtumaw sa pangalan ni Digal nga madestino sa MCPO hulip ni Gillamac daw nakapangangha kaayo kaniya tungod kay wala pa man siya makapili og opisyal nga mangulo sa kapolisan sa maong dakbayan.

Giklaro ni Cortes nga wala pa siya makadawat og listahan sa lima ka mga pangalan sa opisyal gikan sa Police Regional Office (PRO-7) nga iyang pilian.

Si Gillamac sobra na sa duha ka tuig nahimong direktor sa MCPO ug dili na interesadong magpabilin o lugwayan sa iyang pwesto diha sa maong buhatan sa tuyo nga mapalambo pa ang iyang karera sa pagkapolis. (BANAT)