CEBU, Philippines - Patay nang nakit-an ang 57 anyos nga adunay deperensiya sa panghuna -huna nga naglutaw sa dagat duol sa pantalan sa Sitio Mahayahay, barangay Poblacion, lungsod sa Daanbantayan niadtong Domingo sa alas 6:10 sa buntag. Ang nalumos mao si Eduardo Gulpan, 57, minyo ug nagpuyo sa Sitio Sta. Cruz, Poblacion sa maong lungsod.
Si PO3 Dennis Velez sa Daanbantayan Police Station mibutyag sa Banat News nga nasayran nila ang maong hitabo human mopahibawo kanila si Raul Ariesgado, hingkod, nga nagpuyo duol sa pantalan. Nasuta sa kapolisan nga dugay nang nalisoan sa pangisip ang biktima hinungdan nga gipasagdan nalang kini sa mga tagtungod .
Matud pa ni P03 Velez nga naglakaw-lakaw sa karsada ang biktima niadtong Sabado sa gabii ug malagmit miadto kini sa pantalan dayon nahagbong sa dagat. Niana nang pagkabuntag kini hikit-i nga wala nay kinabuhi nga naglutaw-lutaw sa dagat.
Subay sa gihimong medical examination ni Dr. Nicomedes Jabel nasuta nga adunay duha ka samad ang biktima sa iyang tuhod ug laing samad sa iyang baba ug wala makonpirmar sa iyang death certificate ang hinungdan sa kamatayon niini. (BANATNEWS)