Grupo sa mga tulisan nadakpan

CEBU, Philippines - Unom ka mga lalaki, duha niini menor de edad nga naglakip sa usa ka babayeng sakop sa fraternity ang nadakpan human gipasanginlang mga tulisan nga ang modus nila magsakay og multicab ug motorsiklo.

Duha na ka semana nga gipangita sa kapulisan sa dakbayan sa Sugbu ang grupo human sa nagsunod nga insidente sa pagpanulis sa mga pasaheroan ug mga tawong maglakaw panahon sa kaadlawon.

Kagahapon sa alas-5 sayo sa buntag wala na gyud makaugpo ang unom ka mga suspetsado dihang nasigpatan sila sa kapulisan luwan sa kolor dulaw (yellow) nga multicab diha sa dalan N. Bacalso sa barangay Basak San Nicolas ning dakbayan sa Sugbu.

Ang mga suspek giilang sila si Nelgin Briones Dacalos,taga Kinasang-an, Marion Carl Camomot, taga Kinasang-an, Mar Joseph Abellanosa, 18, Ernesto Andog, 24, taga Kinasang-an ug ang duha ka menor de edad nga lalaki ug babaye nga nagpangidaron 17 ug 15-anyos nga taga barangay Lahug.

Kagahapon gipresentar sila ni Sr. Supt. Melvin Ramon Buenafe, hepe sa Cebu City Police Office (CCPO) uban sa mga ebidensyang nakuha gikan sa ilang sakyanan nga nagtangag sa plakang JCS-658. Lakip nga nakuha sa kapulisan ang usa ka .357 revolver ug usa ka .38 revolver nga dunay mga buhing bala, dul-an sa napulo ka cellphone, usa ka laptop, napulo ka nagkalain-laing Identification Cards (I.D’s) sa mga empleyado ug sa tinun-an sa Velez College ug Cebu Doctors College, libro ug mga notebooks, ug shoulder bag.

Ang lima ka mga suspetsado gawas lang sa usa ka babayeng menor de edad positibong giila sa lima ka mga biktima nga maoy mitulis kanila niadtong Pebrero 28 sa kaadlawon ug Domingo sa kaadlawon diha sa dalan Mango Avenue. Matud pa gipaabot sa mga suspek ang mga biktima ug dihang duol na sa ilang sakyanan ilaha kining gitionan ug gitulis niadtong Domingo samtang laing tulo ka biktima mibutyag nga gisakyan sila sa grupo gikan sa Lahug ug pag-abot sa Camputhaw gidiretso sila og tulis.

Ang lima, pulos mihimakak sa pasangil, samtang ang 15-anyos nga babaye, mitug-an sa Banat News nga igo ra siyang gipasakay sa grupo apan naatlan nga sila gipangsikop maong usa siya sa napasanginlang tulisan.

Si Sr. Supt. Buenafe atol sa pakighinabi niini sa mga tigbalita miingon nga duha ka semana na nilang gipangita ang grupo sa mga batan-ong manulis nga magsakay og multicab ug motorsiklo.

Kasong robbery ug illegal possession of firearms and ammunitions ang giandam na sa kapulisan batok sa grupo. (BANATNEWS)