One Cebu hilom apan miserbisyo - Garcia

CEBU, Philippines - Luyo sa kasipa sa kalihokan sa nagkalainlaing partido politikanhon dinhi sa Sugbo, ang One Cebu nagpabiling nagpakahilom ug wala kini mopahayag bahin sa mga laraw alang sa umaabot nga election sa tuig 2013.

Si Governor Gwendolyn Garcia kinsa maoy pangulo sa One Cebu nagkanayon nga serbisyo sa katawhan ang ilang gipalanog ug dili kay ang kisaw bahin sa politika.

Matud pa ni Garcia nga ang ilang plataporma nga gihikyad sa panahon sa ilang kampanyang politikanhon kaniadto maoy ilang gituman ug gipatagamtam sa katawhan.

Alang kang Garcia nagpabiling lig-on ang One Cebu ug kun may mga miting man silang mga opisyal niini, wala usab nila kini ipagarpar ngadto sa publiko.

Kini tungod kay gusto sa gobernador nga magpabilin kanunay ang paglaum sa katawhan nga makadawat sa pangalagad ning maong pundok segun sa ilang nabati sukad kaniadto. Alang kang Garcia nga ang gikinahanglan sa katawhan mao ang serbisyo o buhat ug dili kay pulos lang estorya nga walay buhat.

Samtang gipasalig si Garcia nga karong umaabot nga  Hulyo atol sa katapusan niyang State of the Province Address (SOPA) adto na niya ibutyag kun modagan ba gyud siya sa pagka- senador.

Sa laing bahin, mipadayag usab siya nga wala mosangko sa iyang huna-huna nga kontra partido diay sila si Mayor Aljun Diamante sa lungsod sa Tuburan kinsa ilang gitabangan karon niining paghugpa sa tipos sa maong lungsod.

Matud pa sa gobernador nga ang pangalagad sa iyang administrasyon wala magtan-aw og partido sa tawo kundi ang serbisyo alang sa katawhan tungod kay mao kini ang sagrado niyang katungdanan, matud pa ni Garcia. (BANATNEWS)