2 patay sa kuryente sulod sa usa ka semana

UBAY, BOHOL, Philippines  --- Duna bay tulubagon ang mga electric power distributors sa mga insidenteng moresulta sa kamatayon sa mga residente kansang umahan giagian sa mga powerlines sa maong mga kompanya?

Kining mga pangutanaha mitumaw human duha na ka insidente sa pagkakuryente nga mikalas og duha ka tawo sa duha ka mga lungsod sa Bohol sulod lang sa usa ka semana.

Niadtong Domingo sa hapon, nakatunob og live wire si Wena Bautista, 45, taga Los Angeles, Ubay, Bohol nga miresulta sa iyang kamatayon.

Giingong nagsubay si Bautista sa tampi sa ilang humayan aron magsag-ob og tubig dihang natumban niini ang live wire sa naputol nga powerline sa ibabaw sumala pa sa report sa kapolisan.

Ang laing insidente nahitabo usab sa lungsod sa Antequera diin usa ka giilang Regie Ordinario, nga taga barangay Kinapun-an giingong nakabsan usab sa kinabuhi human makuryentehi.

Sumala pa sa report nag-atiman sa iyang umahan si Ordinario nianang tungora dihang iyang nakit-an ang usa ka nayungyong na og maayo nga linya sa kuryente diha sa iyang umahan, iyaha unta kining wahingon apan nakuryentihan kini. (BANATNEWS)