CEBU, Philippines - Hangtod lang sa sunod semana ang pagpanawat sa mga aplikasyon sa pagka administrador sa Mandaue City College nga nahimutang sa Mandaue City Sports and Cultural Complex sa sitio Tribunal sa barangay Centro sa maong dakbayan.
Kini ang gibutyag ni manlalaban James Abadia, ang city administrator sa kagamhanan sa Mandaue nga nahinabi sa mga tigbalita .
Ang pagpanawat og aplikasyon gihimo sa kagamhanan human mopakanaug og desisyon ang Civil Service Commission (CSC) kalabot sa disqualification ni Dr. Susana Cabahug gikan sa pagdumala sa maong kolehiyo sa gobiyerno tungod sa taas na niining panuigon.
Matud pa ni Abadia nga nagpabilin pa nga bakante ang maong katungdanan hinungdan nga padayon silang nanawat og mga aplikasyon aron hashasan ug pilian kun si kinsa ang angayang ihulip kang Cabahug. Si Dr. Cabahug natudlo nga presidente sa MCC sukad sa pag-asumer ni Mayor Cortes sa unang termino niini isip mayor sa dakbayan niadtong tuig 2007.
Kini human tak-opi sa maong higayon ang MCC nga nag-ukopar kaniadto og mga lawak sa Ibabao National High School nga gidumala ni Dr. Paulus Canete isip presidente niini. Hinuon sumala ni Abadia nga ang assistant college administrator for academic affairs sa MCC maoy ilang gikonsiderar nga mohulip ni Dr. Cabahug. Gitataw niya nga hayan nga makasugod na sa paghupot sa katungdanan ang mohulip kang Dr. Cabahug sa pagbukas unya sa klase sa unang semester niining tuiga. (BANATNEWS)