CEBU, Philippines - Namatay ang 86 anyos nga lola human kini dasmagi sa Ceres bus didto sa national highway sa barangay Daanlungsod sa lungsod sa Oslob niadtong Domingo sa alas 5:00 sa hapon.
Ang biktima mao si Teofila Rendon Puson, 86 , biyuda ug nagpuyo sa maong lugar. Samtang ang drayber sa Ceres bus nga dunay body number nga 8951 mao si Roberto Daugdaug, 38, minyo, ug molupyo sa Poblacion, lungsod sa Argao.
Si PO1 Jun Emar Jekosalem, desk officer sa Oslob Police Station mibutyag sa Banat News nga ang biktima nagbarug -barog daplin sa dalan dihang mikalit kini og labang sa karsada dihang duol na kaayo ang naghaguros nga Ceres bus gikan sa siyudad sa Sugbo ug paingon sa Bato Samboan.
Tungod sa kaapiki na sa pagpreno, milihay ang trak aron nga di masabak ang biktima apan giingong miatras kini dihang nakamatikod nga diha na sa duol kaayo kaniya ang sakyanan.
Maoy hinungdan nga nasabak siya sa bumper sa sakyanan ug nalagpot og pipila ka metros. Sa pagtugpa sa biktima sa sementadong karsada maayong pagkabugsok sa iyang ulo hinungdan nga nawad-an kini sa panimuot.
Gihatod dayon kini ngadto sa Oslob District Hospital diin didto ideklarar nga dead on arrival (DOA) tungod sa seryusong kadaut sa ulo niini nga nabundak sa semento ug mga pangos sa kalawasan.
Ang drayber sa Ceres bus boluntaryo usab dayong mitahan sa iyang kaugalingon sa kapolisan ug kasamtangan kining nabalhog samtang nagpaabot sa tukmang sumbong nga ipasaka batok niya.(/WC) (BANATNEWS)