Dul-an 700 na ang may tipos sa Tuburan

CEBU, Philippines - Dugang 15 pa ka mga pasyente nga gidudahang nasakit og tipos wala pay labot sa kapin usa ka gatos nga nagpa-checkup tungod gihapon sa hilanat ang nagpanon nga nagpahiling sa Tuburan District Hospital sa lungsod sa Tuburan kagahapon lang adlawa. Una na niini nga adunay gibanabanang 500 ka mga tawo ang nakasinati gihapon og sintomas sa sakit nga tipos sa nakalabay’ng semana ug duna pay ubang nangalandig sa tambalanan.

Sa uwahing talaan gikan sa Provincial Health Officer nga Dr. Cristina Gianggo sa press conference kagahapon mibutyag nga miabot na sa 646 ang gidaghanon sa nasakit og tipos sa maong lungsod nga gikan sa 420 ka pamilya.

Matud pa niya 109 ang na-admit sa Tuburan District Hospital ug 14 sa Vicente Sotto Memorial Medical Center.

Giingong upat na ka tawo ang nakalas sa maong lungsod tungod sa mao gihapong sakit ug ang labing uwahi mao ang 7-anyos nga batang namatay niadtong Sabado.

Gibutyag ni Elvin Tangan ang chief nurse sa Tuburan District Hospital dihang nahinabi sa Banat News nga sukad alas 7:00 sa buntag kagahapon hangtud sa udto dugang 15 ka bag-ong pasyente ang na-admit tungod gihapon sa taas nga hilanat nga sintomas sa sakit nga tipos. Giklaro niya nga kini wala pay labot sa laing 113 ka mga pasyenteng nagpa-checkup usab kagahapon sa buntag human makasinati og mga paghilanat, pag-ubo ubo ug sip-on.

Sumala pa ni Tangan sagad sa mga bag-ong pasyente nagagikan sa napulo ka mga barangay nga grabeng naapektahan sa typhoid fever outbreak. Ang mga barangay nga apektado sa outbreak sa sakit nga tipos mao ang Poblacion 1, 2, 3, 4, 5, 6, 7, 8 ingon man ang barangay Cogon ug barangay Tomenhaw.

Aduna nay gipatawag nga emergency meeting si Mayor Aljun Diamante tali sa mga opisyal sa barangay, department heads apil na ang hepe sa Tuburan District Hospital nga si Dr. Steve Legaray.

Si Renan Cimafranca sa Regional Epidemiology and Survielance Unit (RESU) sa Department of Health (DOH)-7 nagkanayon nga paningkamotan nila nga hingpit nga makontrolar ang outbreak sulod ning semanaha.

Dugang mga sakop sa DOH ang gipadala kagahapon sa Tuburan nga nagdala og mga tambal inubanan sa mga sakop sa Integrated Provincial Health Office ug social workers sa Kapitolyo.

Gitambagan ni Cimafranca ang mga molupyo ilabi na sa mga barangay nga apektado nga pabukalan gyud og maayo ang ilang tubig sa dili pa imnon ingon ug pagpahigayon og chlorination niini.

Samtang ang Tuburan District Hospital pagkakarun duna nay augmentation nga mga nurses gikan sa lungsod sa Asturias, health personnel gikan sa Regional Health Unit (RHU) ug mga contractual nurses gikan sa Kapitolyo.

Gawas niini migamit usab karun sa mga volunteer nurses ang maong lungsod aron makaatiman sa nagkadaghang mga pasyente. Si Gov. Gwendolyn Garcia misaad nga abagahon sa Kapitolyo ang gastos sa pagpatambal sa mga biktima, hatagan usab og relief goods ang mga pamilyang apektado samtang salaping hinabang nga P5,000 ang ihatag sa mga namatyan.

Mipadala na usab og mga sakop sa provincial water task force si Garcia aron subayon ang tinubdan sa tubig. Si Interior Secretary Jessie Robredo mipadayag nga mohatag ang ilang buhatan og P10 milyones alang sa maayong water system sa Tuburan. (BANATNEWS)