CEBU, Philippines - Nawad-an sa iyang salapi ug motorsiklo ang usa ka Indian national human kini tulisa sa duha ka wala hiilhing armadong mga lalaki didto sa Sector 2, barangay Pagsabungan, dakbayan sa Mandaue sa miaging udto.
Ang biktima mao si Gurwinder Singh, 25, ulitawo, nga lumad nga taga nasud sa India ug magpapatigayon nga temporaryong nagpuyo sa barangay Lanao, dakbayan sa Danao. Si SPO2 Renato Valle sa Presinto 3 sa Mandaue City Police Office (MCPO) mibutyag nga nagsakay ang biktima sa iyang motorsiklo nga Honda kolor blue paingon ngadto sa dalan J. P. Rizal dihang kalit lang siyang gibabagan sa duha ka wala hiilhing tulisan ug gitionan og armas de fuego dungan ang pagdeklarar nga tulis.
Nakuha sa mga tulisan ang kuwarta sa biktima nga nagkantidad og P5,000 kapin, Samsung nga cellphone nga nagkantidad og P10,000, pitaka, passport, drivers license niini ug uban pang mahinungdanong butang sulod sa iyang pitaka.
Human sa maong tulis ang mga tulisan mimando sa biktima sa pagkanaug sa motorsiklo niini ug ila dayon kining giilog ug gisakyan palayo sa maong lugar. - Romeo T. Limpangog/WC (BANAT NEWS)