Gikang nag-inom gipusil angol

CEBU, Philippines - Samaron ang usa ka lalaki human kini pusila sa usa sa walo ka kriminal didto sa sitio Salinas Drive sa barangay Lahug, dakbayan sa Sugbo kagahapon sa alas 2:00 sa kaadlawon.

Ang biktima mao sila si Nelson Diadopo, 23, nga taga sitio San Miguel, barangay Apas kasikbit nga barangay sa Lahug. Samtang usa    ka suspek mao si Cleneth Sala, 20, nga taga dalan Gochan, barangay Mabolo, syudad sa Sugbo ug laing pito ka batan-ong wala pa hiilhi.

Sa pasiunang imbestigasyon sa kapolisan nasayran nga ang biktima uban sa iyang higala nga si Jimrose Torres ug William Sedenio naglingaw-lingaw og inom sulod sa usa ka beer house sa Salinas Drive. Human sila og inom nanggawas sila ug nagpaabot og sakyanan kay mamauli na sa ilang balay.

Apan samtang nagbarog sila daplin sa karsada giduol sila sa suspetsado uban sa pito ka barkada niini ug sa walay igong hinungdan gipusil ang biktima sa usa sa mga kauban sa suspetsado.

Naigo sa bukobuko ang biktima ug mao usay pag-abot sa kapolisan sa Mabolo hinungdan nga nangalibwag og dagan ang mga kriminal apan si Sala maoy nakuptan sa kapolisan ug nasikop.

Ang biktima gihatod dayon ngadto sa Cebu City Medical Center ug padayon pang gipangita karon sa kapolisan ang pito ka kauban ni Sala.

Ang mga tigpaniid nagkanayon nga mao ni pago sa mga tawo nga bisag tunga nang gabii maglaroy-laroy lang gihapon luyo sa kamangtas na sa mga kriminal karong panahona. - Lesley Caminade-Vestil/WC (BANAT NEWS)