Tanod giluba nakabawos sa nagluba

CEBU, Philippines - Duha ka tawo ang naangol dihang ang tanod nga maoy unang gidunggab nakabawos usab og panunggab atol sa ilang away didto sa barangay Pitalo, lungsod sa San Fernando niadtong Sabado sa gabii.

Ang mga samaron mao sila si Rogelio Parba, 29, ulitawo, tanod sa maong lugar, ug si Henry Quimko, 32, silingan ni Parba. Si PO3 Marjukin Misuari sa San Fernando Police Station mibutyag sa Banat News nga si Parba nakaalinggat nga gitabangan og sungog ang iyang igsoon nga si Julito Parba, hingkod, nila ni Quimko ug ni Sabelo Andos, 24, usa ka mekaniko, nga silingan usab ni Parba. Isip tanod nga kutsilyo ray hinagiban, miduol  si Parba ngadto sa iyang igsoon dihang siya maoy giatubang ni Quimko ug ni Andos.

Nahitabo dayon niadtong tungora ang linayogay kay buot ilugon ni Quimko ug Andos ang kutsilyo nga dala ni Parba.

Dihang nailog ni Andos ang kutsilyo ni Parba, gihansak dayon kini niya ngadto sa bukobuko sa naulahi.

Apan bisan samaron na misukol gihapon si Parba ug nailog pagbalik niini ang iyang kutsilyo.

Dihang midasmag si Quimko kay ilogon na usab niini ang kutsilyo nga didto na kang Parba, wala kini molampos kay giligid ni Parba og dunggab ang nagkalainlaing bahin sa lawas niini hangtod nga naabtan sila sa kapolisan

Gidala silang duha ngadto sa South General Hospital sa siyudad sa Naga samtang ang si Andos gidakop dayon sa kapolisan ug kasamtangang gibalhug sa prisohan samtang gihikay ang kasong ipasaka batok kaniya. – WC (BANAT NEWS)