CEBU, Philippines - Suspendido og unom ka buwan ang kinubkobay sa bas ug graba didto sa sapa sa Sapandaku ug Hinulawan sa dakbayan sa Toledo human kini imando ni Governor Gwendolyn Garcia.
Ang maong temporaryo nga pagsuspenso sa kinubkobay og bas ug graba sa maong sapa maoy nakab-ot nga desisyon sa tigom nga gipatawag sa gobernador didto sa Toledo sa miaging adlaw.
Ang maong tigom gitambongan sa mga opisyal nga naglakip kanila ni Toledo City Mayor Aurelio Espinosa, Councilor Jun Mercado ug Environment Officer Amador Cavan ug ang mga barangay kapitan kansang gidumala nga mga barangay nahimutang kilid sa maong sapa.
Lakip sa mitambong mao ang Legal Officer sa Mines and Geosciences Bureau, manlalaban Gerardo Mahusay ug mga sakop sa Provincial Environment and Natural Resources Office.
Natuki sa maong miting ang bahin sa temporaryo nga pagpahunong sa kinubkobay sa bas ug graba sa maong sapa sulod sa unom ka buwan.
Inigbalik sa 25 ka mga kontraktor nga tigpangubkob sa bas ug graba, kinahanglang ikapasalig nila ngadto sa kagamhanan ug katawhan sa maong lugar nga dili maapektohan sa ilang patigayon ang kabalayan sa mga molupyo nga anaa sa daplin sa maong sapa. Gimando sa gobernador ngadto sa 25 ka mga lisensyado sa pagpangubkob og bas ug graba nga tumanon nilang hingpit ang Administrative Order No. 7 nga nagmando kanila sa pagpananom og mga kahoy sa daplin sa sapa ingon man pagbutang og mga marker kun asa kutob sila makapangubkob sa bas ug graba ug ang paghimo og klaro nga agianan sa tubig sa sapa.
Gikinahanglan usab ang higpit nga pag-monitor sa PENRO uban ang mga sakop sa 78th IB sa Philippine Army nga abagan sa mga opisyal sa barangay. - Chester Abadilla/WC (BANAT NEWS)