CEBU, Philippines - Usa ka wanted kriminal nasikop sa mga operatiba sa intelligence sa Regional Public Safety Battalion (RPSB) sa lungsod sa Sibonga didto sa dalan Archbishop Reyes Avenue, dakbayan sa Sugbo niadtong Sabado sa gabii.
Ang nasikop mao si Isagani Aguirre, 28, lumad nga taga barangay Liki, lungsod sa Ronda apan kasamtangang nagpuyo sa Capitol site, ning dakbayan sa Sugbo.
Ang mga nakasikop kang Aguirre mao sila si Senior Inspector Roland Aliser, PO2 Renato Padigos, PO2 Ramon Canoy ug PO1 Ramon Baluca.
Ang warrant of arrest nga dala sa kapolisan sa ilang pagdakop kang Aguirre giluwat ni Regional Trial Court (RTC) Judge Leopoldo Cañete sa Branch 60 sa lungsod sa Barili bahin sa kasong murder nga giatubang sa suspetsado.
Si Aliser nga nahinabi sa Banat News kagahapon mibutyag nga nakadawat sila og report nga nagpahibawo kalabot sa presensya ni Aguirre didto sa Archbishop Reyes.
Matud ni Aliser nga human nila masuta nga positibo ang maong taho, ila kini giadto niadtong Sabado sa alas 5:30 sa hapon ug didto ila kining nakit-an nga naglingkod atbang sa terminal sa mga PUJ sa Ayala Center.
Matud ni Aliser nga giduol dayon nila ang suspetsado ug nagpaila sila nga mga polis apan giingong si Aguirre giingong misuki kay dili magpadakop busa nahitabo ang kaguliyang sulod sa 20 minutos hangtod nga kini naposasan.
Si Aguirre kinsa giingong sakop sa “Jec-Jec Omboy group” usa ka grupo sa mga gun for hire nga mga kriminal nga naglihok sa bukirang bahin sa mga lungsod sa Alcantara, Ronda ug Dumanjug niadtong tuig 2009 hangtud 2010.
Niadtong 2009 si Aguirre giingong misibat human makapatay didto sa Ronda ug sukad niadto, miadto siya sa Negros Occidental apan mibalik kini nganhi sa Sugbo dihang namingaw na ang maong kaso.
Matud pa ni Aliser nga ang ubang mga kauban ni Aguirre nangasikop na usab.
Si Aguirre temporaryong gidetener sa Sibonga Police Station detention cell. - WC (BANAT NEWS)