Usa patay sa drive-by shooting sa Danao

CEBU, Philippines - Usa ang patay sa laing drive-by shooting sa grupo sa mga lalaki nga nag-inom daplin sa karsada sa P. Del Pilar corner Rizal St., Poblacion siyudad sa Danao kagahapon sa alas 2:45 sa kaadlawon.

Ang biktima nga patay nang nadangat sa tambalanan mao si Christian Lao, 33, nagpuyo sa maong lugar ug nabilanggo na kaniadto tungod sa kasong illegal possession of firearms.

Samtang ang suspek gihulagway lang sa mga nakasaksi nga usa ka lalaking nagsakay og motorsiklo nga walay plate number ug armado og kalibre .45.

Matud ni SPO4 Edgar Gomez, desk officer sa Danao City Police dihang nahinabi sa Banat News nakig-inom ang biktima sa mga barkadang sila si Allan Alerta, Lionel Campios ug Jingle Banzon, daplin sa karsada dihang nahitabo ang pagpamusil.

Ang nagbinugtong nga gikatahapang sakay og motorsiklo daling miikyas human sa pagpamusil. Ang biktima nakaangkon og samad pinusilan sa iyang liog ug bukobuko ug patay na pag-abot sa Danao City District Hospital. - Darrel A. Carumba/EIM (BANAT NEWS)