CEBU, Philippines - Usa ka tawo ang naangol sa nahitabong duha ka buwag nga pagpamomba sa Cotabato City kagahapon sa buntag.
Ang unang pag-ulbo nahitabo luyo sa usa ka beauty parlor sa Gutierrez Avenue sa Rosary Heights 7 nga gibanabanang 100 metros gikan sa ganghaan sa Autonomous Region in Muslim Mindanao (ARMM) diin mahimutang ang mga buhatan niini, sumala pa sa report sa Radyo Mo Nationwide nga gikutlo sa GMA Newstv.
Sa pagsusi sa mga awtoridad sa lugar nadiskubrehan ang laing bomba luyo sa beauty parlor.
Sunod niini ang pag-ulbo sa ikaduhang bomba diha sa sulod mismo sa ARMM compound atubangang bahin sa buhatan sa ARMM Regional Ports Management Authority diin usa ka Brando Esmael, 18, ang giingong naangol.
Samtang usa ka bomb expert sa 7th Marine Battalion Landing Team (MBLT) mibutyag nga laing improvised explosive device (IED) nga ginama sa usa ka bala sa 81-mm mortar ang ilang nakit-an pipila ka metros gikan sa blast site. (BANATNEWS)