Rugby higpit nga bantayan sa PDEA

CEBU, Philippines - Ang mga pabrika, mga wholesale distributor ug mga retailer sa kemikal nga contact cement o rugby gidid-an na karon sa pagbaligya niini ngadto ni bisan kinsang tawo.

Si manlalaban Clarence Paul Oaminal, ang kanhi Dangerous Drugs Board (DDB) Vice Chairman mipahinumdom sa mga tinugyanan sa Philippine Drug Enforcement Agency (PDEA) sa higpit nga pagpatuman sa DDB Regulation No. 2, series sa tuig 2009 nga nag-ulohan “Implementing guidelines for the implementation of Board Regulation # 6 series of 2007, entitled “Classifying Toluene based Contact Cement products without at least five percent mustard oil as dangerous drugs”.

Sumala sa maong balaod ang contact cement   nga walay mustard oil nga baho kaayo (busa dili angayang simhoton) isipon na kini nga dangerous drugs, gawas lang kun adunay pagtugot sa PDEA.

Ang gitawag nga contact cement nga walay mustard oil dili ikabaligya sa mga retailer gawas kun makatuman kini sa mga gipangayo sa balaod.

Ang reglamento nagtakda nga si kinsa mang tawo nga mopalit og dangerous drugs gikan sa usa ka retailer kinahanglang mopresentar siya og balido nga identification card uban sa barangay clearance nga iluwat mismo sa barangay kapitan sa barangay diin magpuyo ang tawo nga mopalit og rugby ug itunol kini ngadto sa tindahan.

Sa barangay clearance kinahanglang itakda    ang gidaghanon sa paliton nga rugby, ang gamitan niini ug ang tax identification number (TIN) sa mopalit. Ang nahisgutang clearance epektibo lamang kini sulod sa tulo ka adlaw gikan sa petsa sa pagluwat niini. (Article VI, Section 1, DDB Regulation No. 2, Series of 2009.

Tungod niini ang mga rugby boys dili na makasayon-sayon sa pagpalit og rugby ug ang mobaligya niini ngadto kanila nga wala makatuman sa gipangayo sa balaod maoy manubag. Ubos sa the Comprehensive Dangerous Drugs Act of 2002 ang makalapas sa maong balaod silotanan sa pagka-bilanggo sulod sa unom ka buwan ug usa ka adlaw ngadto sa upat ka tuig

Si Oaminal naghangyo sa PDEA Compliance Service sa pag-monitor sa mga wholesale distributor ug mga retailer sa contact cement o rugby kun may lisensya ba kay kun wala, ang ilang pagpamaligya sa contact   cement o rugby maisip nga namaligya sila og dangerous drugs ubos sa Section 11 nga susama ra sa paghupot sa   shabu.

An g mga kompaniya nga mamaligya og rugby kinahanglang magbaton usab og Dangerous Drug Control Book sama sa gihimo sa mga pharmacy nga kinahanglang may detalye bahin sa transaksyon kalabot sa contact cement o rugby.  (BANATNEWS)