Walay foul play sa pagkalumos sa bata

CEBU, Philippines - Walay foul play ang kamatayon sa 7- anyos nga batang lalaki nga nalumos nga unang gikatahong gitukmod sa laing grupo sa mga bata samtang nangaligo sa daplin sa kadagatan sa Sea Breeze sa barangay Pusok, dakbayan sa Lapulapu.

Kini ang gipadayag ni PO2 Winston Ybañez sa Homicide Section sa kapolisan sa maong dakbayan sa follow up nga gihimo sa Banat News kagahapon.

Matud pa niya nga hugtanong gipanghimakak sa unom ka unang gikatahapan nga maoy nakaingon sa kamatayon ni Joshua Veloso nga lakip kini sa ilang gibinuangan.

Giangkon hinuon sa unom nga gilangkoban sa 7, 10 ngadto sa 15-anyos nga ilang gilabay og mga bukong ang kauban sa namatay nga 11-anyos.

Nagtuo ang kapolisan nga nadakin-as ang biktima sa gitungtongan ug nahulog ngadto sa kantilado nga bahin sa maong dapit nga giingong nakawakawa nga bahin sa dagat.

Ug gumikan kay dili man kini maantigo nga molangoy maoy hinungdan nga mitidlom kini sa ilawom hangtod nga nalumos.

Si PO1 Bregido Paca usab sa iyang bahin nga nahinabi sa Banat News miingon nga mitakdo usab ang ilang imbestigasyon sa resulta sa awtopsiya ni Dr. Nestor Satur sa PNP Crime Laboratory sanglit nasuta man sa resulta nga walay timailhan sa foul play ang kamatayon niini.

Dugang pa ni Paca nga gituohan hinuon sa mga molupyo sa barangay Pusok nga hilan ang maong dapit sa kadagatan sa barangay Pusok nga gikaligoan sa biktima.  

Gipanghimakak usab ni Paca nga adunay gang sa bata sa dakbayan nga gitawag og Sandugo Boys tungod kay bansag lang kini sa kadalanan sa mga batang libudsuroy. (BANATNEWS)