2 kalabira sa tawo nadiskubrehan

CEBU, Philippines - Duha ka kalabira sa tawo ang nadiskubrehan sa managlahing lugar sulod sa duha ka adlaw diin usa niini gituohang iya sa usa ka 68- anyos nga lolo nga hapit usa ka tuig nang na-missing.

Napalgan ang gituohang bukog ni Jovenal Matugas Ramos nga taga Tipolo sa siyudad sa Mandaue diha sa bukirang bahin sa barangay Sibakan sa siyudad sa Danao niadtong miaging alas 9:00 sa buntag.

Usa ka mangulingay nga si Judilando Onsenis, 40, maoy nakadiskobri sa kalabira nga gidan-okan na sa kasagbutan ug daling gipahibalo ang mga opisyal sa barangay kinsa mao say mitawag sa kapolisan.

Matud ni PO1 Faron Avila, desk officer sa Danao City Police Station dihang nahinabi sa Banat News nga positibong giila sa mga kabanay ang maong bukog nga iya sa gipangita nilang si Jovenal sukad pa niadtong petsa 14 sa bulan sa Hulyo sa niaging tuig.

Sa laing bahin, laing kalabira usab nga walay ulo nga gisulod sa sako ang napalgan diha sa barangay Manipis, dakbayan sa Talisay niadtong Pebrero 27, 2012 apan kagahapon sa buntag lang kini gi-report sa opisyal sa barangay ngadto sa kapolisan.

Si Insp. Rio Hugo Ipong sa Talisay City Police Station nga nahinabi sa Banat News mibutyag nga ang maong mga bukog naglangkob kini sa bukton, paa ug tiil apan walay ulo.

Lakip sa gisulod sa sako uban sa maong kalabira ang mga sapot sa babaye nga dunay sweat shirt ang gituohang gilabay diha sa bung-aw nga ubos niini sapa sa sitio Layugon sa nahisgutang barangay.

Usa sa mga residente sa lugar nga si Astelio Baynos nga nangahoy niadtong higayona maoy nakakita sa bukog.

Gipasabot sa mga opisyal sa barangay ngadto sa kapolisan nga wala dayon sila mo-report tungod kay nagsusi pa sila sa mga residente diha sa lugar kung wala bay nawagtang nga sakop sa ilang pamilya.

Sa imbestigasyon nga gipahigayon sa kapolisan nasuta nga sa milabay’ng tulo ka tuig dunay mga tawo nga giingong taga dakbayan sa Toledo ang nagsusi diha sa lugar kung wala bay napalgang patay’ng lawas.

Ang maong bukog itugyan kini sa kapolisan ngadto sa Crime Scene Investigation sa Cebu Provincial Police Office (CPPO) ug dalhon usab kini ngadto sa crime laboratory.

(BANATNEWS)