Gillamac gikatakdang hulipan

CEBU, Philippines - Gidawat ni Sr. Supt. Noel Gillamac nga inihap na lamang ang mga adlaw sa paghupot niya sa katungdanan isip direktor sa Mandaue City Police Office (MCPO) sanglit bisan unsang orasa niining higayona mahimo na kining hulipan ug ibalhin na usab ngadto sa laing lugar.

Si Gillamac miabot na og duha ka tuig isip direktor sa kwerpo sa kapolisan sa maong dakbayan ug gikatakdang pasidunggan sa dakbayan pinaagi sa gipalabang ni Konsehal Diosdado Suico nga usa ka resolusyon nga nagdayeg sa kalamposan sa maong hepe sa kampanya kontra krimen.

Gitataw ni Suico sa iyang resolusyon nga ubos sa pagpangulo ni Gillamac sa MCPO mikunhod ang kriminalidad sa dakbayan nga dako og natampo sa paglambo sa siyudad. Si Mandaue City Administrator James Abadia sa iyang bahin miingon nga gipaabot pa ni Mayor Jonas Cortes ang lima ka mga pangalan sa mga opisyal nga isumitir sa Police Regional Office-7 aron pilian hulip ni Gillamac.

Apan gitataw niya nga natagbaw kaayo ang mayor sa maayong labok ni Gillamac pagdumala sa MCPO hinungdan nga usa sa mga tinguha sa siyudad nga hangyuon ang kadagkoan sa PNP nga lugwayan pa ang termino ni Gillamac. (BANATNEWS)