CEBU, Philippines - Duha ka mga alarma sa sunog gitubag sa kabomberohan sa dakbayan sa Mandaue kagahapon sa buntag atol usab sa pagbukas sa mga kalihokan sa fire prevention month nga nagsugod sa Marso 1 hangtod sa Marso 31 niining tuiga.
Si Mandaue City Fire Marshall Rogelio Bongabong nga nahinabi sa Banat News miingon nga unang alarma ilang nadawat alas-9 ang takna sa buntag sa maong adlaw ug gisundan kini sa barangay Casuntingan.
Gitug-an ni Bongabong nga dali ra hinuong napawong sa mga molupyo ug wala na makapasirit pa og tubig ang kabomberohan paghidangat sa maong dapit sa duha ka sunog. Nunot niini si Bongabong miingon nga lainlaing mga kalihokan ilang gihan-ay sa bulan sa Marso niining tuiga nga naglakip na ang ilang pagpahigayon og mga seminar kontra sunog ug kalamidad ngadto sa mga molupyo.
Ang tema sa fire prevention month karong tuiga mao kini “Makiisa at Makialam Upang ang Sunog ay Maiwasan.”
Gitataw ni Bongabong nga base sa mga natala sa ilang buhatan sagad sa hinungdan sa sunog mao ang pagpasagad sa publiko. (BANATNEWS)