Ulo sa 'kawatan' naugbok sa yuta patay

CEBU, Philippines - Patay nang nakit-an ang lalaking gidudahang kawatan og lubi human nabugsok ang ulo niini sa yuta human gituohang aksidenteng natagak sa Barangay Lamintak lungsod sa Medillen mga alas 8:00 niadtong Miyerkules sa gabii.

Ang napalgang patay na ug nalubong pa ang ulo sa lapukong yuta pabiling wala pa mailhi sa kapulisan sa paghimo ning balita apan gihulagway kini nga hingkod ang panuigon, naka-shorts og kolor puti ug nagsuot og sweat shirt nga kolor dark blue ug ang duha niya ka tsinelas gisuksok sa iyang duha ka mga bukton.

Matud ni PO3 Roland Ruben sa Medillen Police Station dihang nahinabi sa Banat News usa ka Lorioso Mabaylan, nga paingong manguha og kumpay maoy nakadiskubre sa maong patay’ng lawas.

Apan dihang miresponde ang mga polis nasuta nga patay na kini ug nanggawas ang dugo sa ilong ug nabali ang ulo niini nga nagtuwad pa.

Gituohan sa kapulisan nga nanguha og butong ug aksidente kining natagak nga nag-una ang ulo pagtugpa sa yuta hinungdan nga nabugsok kini ug namatay.

Ang kapulisan nanawagan si kinsa kadtong nawad-an og kabanay nga lalaki sa pag-adto sa ilang buhatan aron pag-ila sa maong lalaki ug aron usab mahatagan kini og tukmang lubong.

Gituohang dili molupyo sa maong lugar ang biktima tungod kay walay bisan usa nga nakaila niini sa maong lugar. (BANATNEWS)