CEBU, Philippines - Hingpit nga gibantayan sa mga tinugyanan sa Department of Veterinary Medicine and Fisheries (DVMF) sa mga isdang gipamaligya sa kamerkadohan tungod sa mga balitang adunay mga namaligya niining nanikas sa timbang. Sumala pa sa pangulo sa DVMF nga si Dr. Alice Utlang nga dunay mga dagkong isda nga mibug-at gumikan kay gisudlan og gagmay’ng mga isda ang ginhawaan niini hinungdan nga modako ang timbang unya modako usab ang bayranan sa mga kustomer. Nagkanayon si Utlang nga usa kini ka matang sa pagpanikas. Usa ka operasyon ang ilang gilusad pipila ka semana na ang nakalabay apan nakabantay ang mga fish vendors nga tikasan ug namiya sa ilang pwesto.
Si Utlang nagkanayon nga adunay silot alang niadtong mga tikasan sama sa multang moabot ngadto sa P5,000 ug posible pang makasohan ngadto sa korte gumikan sa paglapas sa Consumers Act.
Matud pa niya nga dali ra nga mailhan ang isdang sinudlan ang ginhawaan gumikan kay magbuka ang pipila ka parte niini ug sobra ra kadako ang tiyan.
Gidasig ni Utlang ang publiko nga kung makapalit sa maong klase sa isda mahimo sila nga mo-report sa ilang buhatan. ( EIM) - (BANAT NEWS)