Kita sa PBA para streetchildren

CEBU, Philippines - Si Lapulapu City Mayor Paz Radaza mibutyag nga ipahinungod ngadto sa 300 ka mga libudsuroy nga kabataan ang kitaon sa umaabot nga duwa sa PBA nga ipahigayon sa Hoopsdome, sa dakbayan sa Lapulapu karong Marso 24, 2012. Matud pa ni Mayor Radaza nga ang duwa tali sa Rain or Shine ug Talk and Text sa PBA himoon karong Marso 24, 2012 sa Hoopsdome gituohang dugokon sa daghang tawo busa ang kitaon sa tiket niini ihapak ngadto sa streetchildren sa dakbayan. Sa pagkakaron may 300 ka mga bata nga anaa sa kustodiya sa DSWS sa dakbayan sa Lapulapu ug sila maoy makabenepisyo niini alang sa ilang mga pagkaon, livelihood program ug edukasyon.

Samtang hugot nga siguridad alang sa mga magduduwa sa PBA ang ipatuman sa kagamhanan ug ang rerouting scheme sa mga sakyanan nga moagi sa hoopsdome gitun-an pa karon sa kapolisan alang sa mga manan-aw sa maong duwa.

Padayon usab ang kampanya sa lokal nga kagamhanan sa dakbayan sa Lapulapu sa paghipos ug pag-atiman sa mga batang nagsuroysuroy sa kadalanan ug nagpakilimos sa mga motorist. - (BANAT NEWS)