Trapiko mihuot sa rally sa INC

CEBU, Philippines - Naghuot ang dagan sa trapiko kagahapon sa palibot sa Fuente Osmeña rotunda, dakbayan sa Sugbo tungod sa panagtapok sa mga miyembro sa Iglesia ni Cristo (INC) sa gipahigayon nilang Grand Evangelical Mission (GEM).

Base sa report sa TV Patrol Central Visayas nga nag-abot-abot kagahapon sa lugar ang mga miyembro sa INC nga naggikan sa nagkalain-laing lugar sa Central Visayas.

Ang karsada habig sa uptown ug downtown area pulos puno sa mga sakyanan tungod kay ang masigkakilid giparkingan sa mga sakyanan sa mga sakop sa INC nga mitambong sa maong tigom

Ang mga sakyanan nga naanad na nga tig-agian sa maong rota naglisud na sa paglihok gumikan sa kahuot.

Ang mga sakop sa INC nga nanambong sa naandan nilang pagpadayag sa pagtulon-an sa maong relihiyon naggikan sa mga kalungsoran sa lalawigan sa Sugbo, Bohol, Negros Oriental ug Siquijor.

Gikan pa ala 1:00 sa hapon hangtod sa alas 6:00 sa gabii nga maoy pagsugod sa maong kalihokan wala na masulod ang daghang mga sakop sa INC sa rotunda sa Fuente busa didto na kini sa gawas sa plaza   nga misud-ong sa pamahayag pinaagi sa mga wide screen nga gipanaod sa maong mga lugar. Ang kapolisan   ug ang mga sakop sa Citom maoy nagpatunhay sa kalinaw ug kahusay sa maong lugar

Ang nahisgutang GEM nga gisugdan sa alas 6:00 sa gabii natapos sa pagka-alas 9:00 sa gabii. Gibana-bana sa kapolisan   nga mikabat og 15,000 ngadto sa 20,000 ang mitambong sa nahisgutang kalihukan.

Ang maong tigom sa INC gihimong dungan sa tibook nasud ug sa mga lokal niini sa ubang nasud  sa gawas.

Sa sayo pa gikabalak-an sa kadaghanan nga may labot sa impeachment case ni CJ Corona ang maong kalihokan.

Apan kutob sa mga nakasaksi nasuta nila nga puro bahin sa pagtulon-an sa Dios ang gibatbat sa mga ebanghelista sa maong relihiyon nga nahimong mamumulong.

Alang sa mga sakop sa maong pundok, naanad na sila sa kalihokan nga kanunay’ng gipahigayon sulod sa ilang kapilya matag karon ug unya nga nanapit og mga dili nila kauban sa pagtuo aron makadungog bahin sa mga pagtulon-an sa Dios nga nakasulat sa Biblia.

Gumikan kay panagsa ra mopahigayon ang INC og GEM sa mga dagkong plaza publiko, hinungdan nga daghang nabag-ohan sa maong kalihokan ug nasaypan nila nga may labot kini sa    dagan sa politika sa nasud.

Sumala sa gipadayag na sa mga kadagkoan sa maong relihiyon nga sukad pa sa unang nagdumala o administrador niini nga si Felix Manalo, Eraño Manalo ug Eduardo Manalo karong panahona, sa tibuok kasaysayan sa maong pundok nagpabilin ang INC nga wa manghilabot sa palakaw sa goberno sa nasud ug sa mga isyung politikanhon.

Mabati lang ang maong relihiyon panahon sa election tungod sa ilang panaghiusa sa pagbotar sa mapili nilang kandidato. (WC) - (BANAT NEWS)