CEBU, Philippines - Nasikop sa buybust operation ang usa ka kanhi polis nga namaligya og ginadiling drugas ug nakuhaan pa og binultong shabu diha sa barangay San Vicente siyudad sa Bogo niadtong Lunes sa alas 6:00 sa gabii.
Ang nasikop sa buybust operation sa kapulisan mao si kanhi PO1 Zandro Saceda Arreisgado, 38, taga Esperanza, Masbate apan anaa mag-abang og panimay sa Bogo City.
Siya nataktak sa serbisyo niadtong 2005 sa bulan sa Marso human mag-awol (Absence Without Official Leave) ug katapusang nadestino sa Station-1 sa Mandaue City Police Office (MCPO).
Matud ni Chief Insp. Ceferiano Tabay Jr., hepe sa Bogo City police dihang nahinabi sa Banat News nakadawat sila og impormasyong si Arreisgado maoy tigpayuhot og ilegal nga drugas sa maong dapit hinungdan sa operasyon.
Gamit ang markadong kwarta giingong napalitan og ilegal nga drugas sa poseur buyer si Arreisgado ug dihadiha gisikop.
Ang suspek ika-11 sa watchlist target drug personalities sa kapulisan sa siyudad sa Bogo. EIM - (BANAT NEWS)