National Migrants Sunday gisaulog

CEBU, Philippines - Dul-an 1,000 ka mga migrant worker sa Sugbo uban sa ilang mga pamilya ang miduyog sa pagsaulog sa ika-26 nga National Migrants Sunday (NMS) nga gipasiugdahan sa Archdiocese sa Sugbo sa miaging Domingo. Ang maong kasaulogan gitumong aron sa paghatag og bili ug pag-ampo sa kaluwasan sa mga Overseas Filipino Workers (OFW) samtang atua sila sa gawas sa nasud lakip na usab ang ilang mga gibiyaang pamilya dinhi sa nasud.

Gisaulog kini matag unang Domingo sa Lenten season nga gipunting alang sa paghatag og pagtagad ingon man pagdayeg sa mga OFW.

Sa paghingpit sa maong kasaulogan, usa ka misa ang gipahigayon kagahapon didto sa Mariners’ Court sa Pier Uno nga gidumala nila ni Cebu Archbishop Jose Palma ug Maasin Bishop Precioso Cantillas ang chairman sa Philippine Commission for the Pastoral Care of Migrants and Itenerant People.

Sa wali ni Cantillas, iyang gipasabot ang kalisud sa sitwasyon sa usa ka OFW nga mobiya sa nasud nga mobiya sa iyang pamilya aron manimpad sa laing nasud.

Alang kaniya nga maayo man unta ang tinguha sa usa ka OFW nga manarbaho sa gawas aron makakuwarta, apan ang pagbiya sa pamilya niini dinhi sa nasud usa ka malisud kaayong desisyon kay ang usa ka magtiayon dili gyud unta angay nga magkalinay-anay.

Busa giawhag ni Cantillas ang kagamhanan nga maningkamot aron kahatagan og trabaho ang mga OFW nga mahiuli dinhi sa nasud aron dili na sila  kinahanglang mogawas pa sa nasud.

Giampo usab sa simbahan ang pipila ka mga OFW nga atoa sa gawas nasud kinsa napugos pagbuhat og illegal nga butang aron lang makahatag og luag nga panginabuhi sa ilang pamilya nga nahibilin sa nasud. (BANATNEWS)