Polis nakapusil sa paryenteng hubog ug nanghasi

CEBU, Philippines - Aksidenting napusilan sa off duty nga polis ang iyang paryente nga nanghagis sa kahubog didto sa Sitio Binlod, barangay Bulasa, lungsod sa Argao niadtong Domingo sa alas 8:20 sa gabii.

Ang biktima mao si Charlito Tampus Naces, 30, minyo ug nagpuyo sa Sitio Minggay, barangay Bulasa ug usa ka drayber. Samtang ang gitumbok nga aksidenting nakapusil kaniya mao si PO2 Bobby Naces, 37, minyo, nagpuyo sa maong lugar ug nadestino sa Argao Police Station apan off duty niadtong tungora.

Si PO2 Benjamen Gerozaga, desk officer sa Argao Police Station mibutyag sa Banat News nga ang suspek gipahibawo sa iyang mga silingan bahin sa kagubot nga nahitabo sa mga nagduwa og basketball niadtong higayona.

Daling mirespondi si PO2 Naces ug mitambag kini sa biktima ug sa duha niini ka kauban nga sila si Arnold Candungan, 32 , ug Mark Gerald Manila, 24, nga pulos nagpuyo sa maong lugar kinsa gihulagway nga mga hubog kaayo ug nangita og away sa maong lugar.

Apan dihang gibadlong ni PO2 Naces wala kini mopatuo ug siya na usab ang giharong sa tulo ug ang biktima misuway pa pag-ilog sa iyang service pistol nga kalibre .45.

Sa nag-inilogay sila ug naglinayogay, wala tuyoa nga nakablit   sa polis ang gatilyo sa iyang armas ug naigo sa tuong bahin sa abaga ang biktima.

Dali usab nga nangabot ang ubang mga polis nga mirespondi ug gisikop ang laing duha ka mga kauban sa biktima.

Gihatod dayon ang biktima ngadto sa Isidro Kintanar Memorial Medical Center apan human madapati og tambal gipagawas dayon kini sa mga doktor sa tambalanan.

Samtang ang hepe sa Argao Police nga si Insp. Alejandro Batobalonos mibutyag sa Banat News nga iya nang gipaubos sa camp restriction si P02 Naces samtang nagpaabot sa imbistigasiyon nga himoon sa Cebu Police Provincial Office (CPPO) pinaagi ni Sr/Supt. Patrocenio Comendador. (BANATNEWS)