Konsehal nanio'g armas

CEBU, Philippines - Usa ka doktor ug konsehal sa lungsod sa Barili gireklamo sa usa ka supervisor sa lending firm sa pagpanukmag, pagpanion og kutsilyo ug may dala pang armas de fuego samtang naningil siya sa iyang mga suki didto sa Poblacion, lungsod sa Barili niadtong Huwebes sa alas 11:40 sa udto.

Ang biktima nga naghangos sa kahadlok nga nagpa -blotter sa Barili Police Station mao si Felix Guilliano, 49, minyo, ug supervisor sa M John Lending Company nga nagbase sa barangay Luray-2, siyudad sa Toledo.

Samtang ang iyang gitumbok nga responsabli sa pagpanghulga kaniya mao si Dr. Rene Hector Gandionco, hingkod, taga   Nasipit, Barili ug konsehal sa maong lungsod.

Subay sa blotter sa Barili Police Station pinaagi ni police investigator PO2 Hector Veloso ang biktima nisumbong nga samtang nakig-estorya siya sa usa ka tindera sa lungsod nga ilang customer kalit lang kunong miabot ang suspek nga konsehal.

Unya wala kunoy   daghang pangutana, mideretso kini og lanit sa iyang kutsilyo ug gition ngadto sa iyang nawong uban sa pag-ingon, “kita ka ani hait kaayo ni”, dugang asoy sa suspek.

Wala pa kuno matagbaw ang suspek, gisumbag pa niini ang biktima ug nasabak kini sa tuong kilid ug pagkahuman gi-ablihan niini ang iyang bag nga gibakos sa hawak dayon gipakita niini ang kalibre .45 nga pistola ug miingon, “Kita ka ani 45 ni” unya pagkahuman og estorya mibiya kini pahilayo sa maong dapit.

Ang biktima kinsa giingong nagkurog sa kalisang daling nagpa-blotter sa buhatan sa kapolisan sa lungsod.

Gisuwayan unta pagkuha ning tigbalita   si konsehal Gandionco apan kanunay’ng busy ang landline sa Sanguniang Panglungsod Office sa Barili nga may mga numero nga 470-9007 ug 470-9008 hinungdan nga wala siya kakuhai og pamahayag sa Banat News kagahapon sa udto. (WC). (BANATNEWS)