Magpasubra'g kargang tubo dakpon

CEBU, Philippines - Si Governor Gwendolyn Garcia mitakda nga moluwat og Executive Order (EO) nga magmando sa pagdakop sa mga trak de karga nga magpasobra og karga sa tubo sugod sa Abril 1, 2012.

 Ang maong lakang himoon sa gobernador aron mapakgang ang pangabuso sa mga asendiro og tubo nga hilabihang makakarga og tubo sa mga sakyanan nga tighakot niini nga maoy hinungdan sa dali kaayong disgrasya sa kadalanan nga mokalas og kinabuhi.

Nasuta sa kagamhanan sa lalawigan    nga ang mga hingtungdan niini mao ang mga asendiro og tubo uban sa mga hauler sa amihanang bahin sa lalawigan.

Sa iyang pakigtagbo sa mga representante sa mga sugarcane planter ug hauler uban sa hepe sa Cebu Provincial Police Office, Land Transportation Office, highway patrol group ug uban pa, gipasidan-an ni Garcia ang mga hingtungdan nga sugod sa Abril 1, 2012 idestino na niya ang Team Eskina nga maoy momonitor sa mga trak de karga nga magpasobra sa kargamentong tubo niini.

Kini pinasubay sa usa ka EO nga iyang luwatan  nga kaluhaan usab og susamang ordinansa nga pandayon sa hunta probinsyal sa Sugbo.

Gumikan niini ang mga tag-iya og katubhan ug mga tag-iya sa mga trak nga tighakot sa ilang mga tubo nagkanayon nga   ilang ipahibalo sa ilang mga ginsakopan ang ilang nasabotan sa gobernador nga kinahanglang igo-igo lang gidaghanon sa tubo ang ilang ikarga sa matag ten wheeler truck.

Usa lang ka tiil ang gitugot sa gobernador nga mahimong ipalamwas sa tukmang gihabugon sa kargamento  niini, way mosiwil sa matag kilid sa trak ug kinahanglang tabunan og trapal.

Ang lakang sa gobernador gisuportahan sa kadagkuan sa kapulisan nga usa sa mopatuman sa kamanduan sa gobernador.  - BANAT NEWS