6-anyos nadasmagan patay sa motor

CEBU, Philippines - Namatay ang 6-anyos nga batang lalaki human kini dasmagi sa motorsiklo samtang mitabok sa karsada didto sa highway sa barangay Kalumbuyan, lungsod sa Sogod niadtong Sabado sa alas 5:30 sa hapon.

Ang biktima mao si John Marvin Jimenez, 6, ug nagpuyo sa maong lugar.

Samtang ang nakadasmag kaniya mao ang Honda RS nga motorsiklo nga gimaneho ni Randy Mante, 29, minyo, nga taga barangay Damulog, lungsod sa Sogod ug nagtrabaho sa usa ka furniture company.

Si PO1 Terso Coming sa Sogod Police Station mibutyag sa Banat News nga ang motorsiklo gikan sa lungsod sa Borbon   nga nagpaingon sa Sogod.

Apan pag-abot niini sa maong lugar wala hibantayi sa drayber ang kalit nga paglabang sa   biktima sa karsada nga nataligam-an sa nagbantay.

Gumikan sa kakalit wala na mapiog sa suspetsado sa pagpreno ang iyang motorsiklo hinungdan nga nasabak ang bata ug nadaro kini sa sementadong karsada hinungdan nga nabusdak ang ulo niini sa karsada.

Misukarap usab ang motorsiklo ug nalamba   sa karsada ang drayber busa nahiagom usab kini sa daghang samad ug bun-og sa lawas.

Dali nga gitabang sa drayber ang bata ug iya kining gihatod dayon ngadto   sa Juan Dosado Memorial Hospital apan gibalhin   kini ngadto   sa Vicente Sotto Memorial Medical Center (VSMMC) sa dakbayan sa Sugbo diin didto mabugtui sa kinabuhi paglabay sa duha ka oras.

Nasuta sa doktor ang grabeng kadaot sa ulo nga nahiagoman sa biktima nga maoy hinungdan sa iyang kamatayon.

Ang drayber sa motorsiklo mitahan usab dayon sa iyang kaugalingon ngadto sa kapolisan sa Sogod diin siya ikustodiya samtang nagpaabot sa kiha nga isang-at sa mga ginikanan sa biktima.  - BANAT NEWS