E-Blotter System gilusad sa Negros Oriental

DUMAGUETE CITY, Philippines  – Gilusad sa kapolisan sa Negros Oriental sugod niadtong Biyernes ug mao nay nahimong labing unang provincial police office sa Central Visayas (Region 7) nga migamit sa PNP E-Blotter System.

Ang maong modernong sistema gipatuman alang sa mas maayo ug epektibong kampanya ug estratehiya kontra krimen ug sa paghimong moderno sa PNP crime data base.

Mismo si Region 7 Police Director Chief Supt. Marcelo Garbo ang nangulo sa pormal nga implimentasyon sa E-Blotter System uban ni Negros Oriental Gov. Roel Degamo, PNP provincial director Sr. Supt. Edward Carranza ug uban pang dagkong opisyal sa gobiyerno.

Samtang ang mga hepe sa mga police stations sa lima ka siyudad ug 20 ka mga lungsod sa Negros Oriental ang midawat sa ilang mga computers ug uban pang kagamitan alang sa katumanan sa E-Blotter System.

Pinaagi sa E-Blotter project, tanang mga krimen, pangalan sa mga suspek, rogue gallery sa tanang mga kriminal ug mga suspetsado sa mga krimen ug uban pang mga impormasyon bahin kanila isulod sa computer.

Kini ipadala ngadto sa PNP Region 7 Office ngadto na sa PNP national headquarters sa Camp Crame, Quezon City.

Hinuon ang maong proyekto dili buksan sa publiko sumala pa ni Sr. Supt. Edward Carranza, kini naglakip usab sa mga sakop sa media ug kinahanglang adunay permiso gikan sa provincial police director aron makakuha og impormasyon.

Gipasabot ni Carranza nga kung unsay nakasulat sa blotter mao usab ang naa sa E-Blotter. Gipaabot nga hingpit nga makonekta ang tanang police stations sa Negros Oriental pinaagi sa internet karong sunod semana. (BANATNEWS)