CEBU, Philippines - Ang Cebu Provincial Anti-Illigal Fishing Task Force sa kagamhanan sa lalawigan sa Sugbo nangandam karon alang sa pagpasaka og kaso batok sa mipalit sa 65 ka kahon nga pinabuthang isda nga nasakmit sa Team Eskina didto sa barangay Sabang siyudad sa Danao sa miaging adlaw.
Kini human ang usa ka babayeng negosyante og isda kansang ngalan gipugngan maoy miduol sa task force ug nagpaila nga maoy tag-iya sa gisakmit nga pinabuthang Tamban ug Tuloy.
Sumala pa ni Engr. Oscar Barcenas ang team leader sa Team Eskina sa Cebu Provincial Anti-Illegal Fishing Task Force nga ang nahisgutang babaye buot unta nga mokuha og balik sa maong mga isda nga gikarga sa Isuzu Canter ug Isuzu Elf .
Sigun pa ni Barcenas nga niining higayona dili sila maglisod sa pagpasaka og tukmang kaso kay may tawo man nga miduol kanila ug nagpailang tag-iya sa pinabuthang isda.
Samtang ila usab nga gitun-an ang paglakip usab sa pagpasaka og kaso batok sa tag-iya sa duha ka trak nga maoy gikargahan sa maong mga isdang pinabuthan.
Matud pa niya nga ang 65 ka kahon nga pinabuthang isda nga itumod unta sa Pasil Public Market sa siyudad sa Sugbo mikantidad og kapin sa P97mil.
Ang maong mga isda gipanghatag sa task force ngadto sa mga balay kaluoy dinhi sa Sugbo alang sa mga kabataan nga gisagop ug gialima niini. (BANATNEWS)