Guba hospital modawat na'g pasiyente

CEBU, Philippines - Ang Department of Health (DOH) mitugot na sa Guba Community Hospital sa barangay Guba ning dakbayan sa Sugbo nga makadawat na og mga pasyente.

Kini ang gibutyag   ni Dr. Gloria Duterte, hepe sa Cebu City Medical Center (CCMC) kinsa nagkanayon nga sukad pa sa miaging buwan gitugotan   na ang maong tambalanan sa pagdawat og mga pasyente.

Gani matud pa ni Duterte nga angay malipay ang mga molupuyo sa bukirang mga barangay sa dakbayan sa Sugbo ilabi na sa kasikbit nga lugar sa Guba   kay dili na sila kinahanglang molugsong pa sa CCMC kun may balatian sila sa lawas.

Matud ni Duterte nga usa sa mga gipangayo kaniadto   sa DOH mao ang igong gidaghanon sa mga empleyado sa maong tambalanan nga makaalagad sa mga pasyente.

Sa pagkakaron gikan sa duha, miabot na ngadto sa lima ka mga doktor ang gidestino sa nahisgutang tambalanan ug gidugangan na usab ang mga ekipo niini , sumala ni Duterte.

Modawat na usab ang maong tambalanan og minor o ginagmay nga operasyon apan ang major surgery adto gihapon himoon sa CCMC.

Midugang si Duterte nga suplayan usab nila   og igong gidaghanon sa mga tambal ang Guba Community Hospital aron dili na maglisod sa    pagpangita ang mga pasyente sa irisita kanila sa doktor.

Niadtong 2010, mga outpatient o pasyente lang nga gagmay og   sakit maoy gidawat sa maong tambalanan sama sa   diarrhea, hilanat, ubo, sip-on ug uban pang minor nga        balatian.

Samtang karong adlawa mopahigayon usab og medical mission didto sa Barangay Guba ang usa ka pribadong sektor inabagan sa mga tinugyanan sa CCMC nga mapahimuslan sa usa ka libo ka mga tawo , matud pa ni Duterte. (BANATNEWS)