Sinkholes normal lang-MGB-7

CEBU, Philippines - Gipasalig sa mga awtoridad nga walay angayang kabalak-an ang katawhan kalabot sa mga nanungha nga mga sinkholes sa nagkadaiyang lugar sa Sugbo human sa linog nga mitay-og niadtong Pebrero 6.

Si Abraham Lucero, Senior Science Research Specialist sa Mines and Geosciences Bureau (MGB) mibutyag sa Banat News nga ang mga sinkholes   epekto lang gyud sa linog nga mitay-og sa Sugbo ug Negros Oriental.

Gihulagway ni Lucero nga talagsaon kaayo ang linog nga mitay-og sa Sugbo tungod sa kakusog niini apan normal ra gyud ang adunay mga susamang kausaban sa yuta human niini.

“ Normal raman na siya due to the earthquake nga miigo dire sa atoa,” pasabot pa ni Lucero.

Dugang pa ni Lucero nga tungod sa maong linog posibleng natay-og ang ilawom nga bahin sa yuta nga nakamugna kini og cavities o mga liki nga dihang nalumpag nahimong mga sinkholes.

Matud pa niya gawas sa sinkholes aduna usab mga nangliki-liki nga yuta nga resulta gihapon sa linog ug kung dunay makit-ang susama niini mas maayong ipahibalo dayon kini sa ilang mga Barangay Disaster Coordinating Council kini aron mahatagan og pagtagad.       

“Tambag lang nako nga kinahanglan constant monitoring lang, if naay liki e-report dayun na sa proper authorities naa man tay naka-detail nga barangay coordinating council nga motubag sa mga in-ana nga problema,” matud pa ni Lucero.

Kahinumduman nga dunay mga sinkholes nga nadiskubrehan sa lungsod sa Dalaguete,Ginatilan ug Dumanjug. (BANATNEWS)