Obenza out! Lawas in sa LCPO

CEBU, Philippines - Pormal nang gihulipan si Sr.Supt. Anthony Obenza isip direktor sa kapolisan sa dakbayan sa Lapulapu sa milabay’ng adlaw ni Sr. Supt. Rey Lyndon Lawas nga giinstalar ni Sr. Supt. Louie Oppus ang Deputy Regional Director for Operation sa PRO-7 sa hilom nga pamaagi.

Atol sa maong turnover gipahimangnoan ni Oppus si Lawas sa mga butang nga angayang buhaton sa dakbayan sa Lapulapu. Si Oppus maoy kanhi direktor sa kaniadto Lapulapu City Police Station hangtud nga nahimo na kining Lapulapu City Police Office.

Si Lawas mipadayag nga iyang himuon ang tanan nga makahatag og katagbawan sa ilang serbisyo.

Lakip sa himuon unya ni Lawas mao ang pagtuon og scuba diving gumikan kay lakip kini sa programa sa lokal nga kagamhanan ang pagprotiher sa kalikupan ilawom sa kadagatan.

Si Obenza ibalik sa buhatan sa PRO 7 ug posibleng magdala kini og usa ka unit sa kapolisan.

Samtang si Lapulapu City Mayor Paz Radaza sa iyang bahin wala mokomentaryo sa paghulip kang Obenza ug wala sad kini pagsupak sa paglingkod ni Lawas.

Ang kasulbaran sa krimen ug illegal nga drugas sa dakbayan maoy unang buot nga pahimoan sa mayor og aksyon gikan sa kapolisan. (BANATNEWS)