CEBU, Philippines - Usa ka lalaking naangol human mapusili sulod sa iyang balay sa wala mailhing lalaki niadtong Huwebes sa buntag sa dalan Juan Luna sa barangay Poblacion, dakbayan sa Danao ang nadiskubrehang aduna diay duha ka warrants of arrest sa kasong may labot sa ilegal nga drugas.
Ang biktima mao si Allan Batocan, 31, nagpuyo sa nahitaboan, samtang padayon pa pag-ila ang kapolisan sa mipusil sa biktima.
Si SPO4 Edgar Gomez sa kapolisan sa maong dakbayan nga nahinabi sa Banat News miingon nga nag-inusara ang biktima sa ilang balay dihang kalit misaka ang wala hiilhing lalaki ug mipusil niini makadaghang higayon.
Matud pa ni Gomez atol sa ilang imbestigasyon nasuta nga adunay duha ka mga warrant of arrest sa sala ni Judge Teresita Galanida sa Regional Trial Court (RTC) 7 Branch 26 sa dakbayan sa Sugbo sa kaso sa ilegal nga drugas si Batocan.
Ang mga silingan sa biktima mao nay midala kang Batocan sa Danao Provincial Hospital ug gibalhin sa Vicente Sotto Memorial Medical Center sa dakbayan sa Sugbo.
Matud pa ni Gomez base sa impormasyong nakuha sa mga imbestigador nakit-an ang mamumuno sa sayo pa nga nakig-inom sa usa ka Henny Bariga nga nagpuyo usab sa maong dapit. Ang biktima nakaangkon og samad pinusilan sa liog, dughan, tiyan ug uban pang bahin sa iyang kalawasan.(/EIM) (BANATNEWS)