CEBU, Philippines - Nakaangkon og grabeng kadaot sa iyang lawas ang usa ka drayber sa habal-habal human ang drayber sa usa ka trak nakatulog ug gidaro ang gi-estambayang waiting shed sa biktima diha sa sitio Lamac, barangay Ilihan, lungsod sa Tabogon.
Ang biktima giila sa mga polis nga si Oscar Gulbin, taga barangay Kantobaon, lungsod sa Tabuelan, kinsa gidala sa Juan Dosado District Hospital sa lungsod sa Sogod apan tungod sa kahimtang niini gibalhin sa usa sa mga tambalanan sa dakbayan sa Sugbo.
Sa imbestigasyon sa kapolisan si Gulbin giingong nalagpot tulo ka dupa human maigo sa trak ang iyang bat-ang. Gibalhog na ang drayber sa Mitsubishi Fuso truck nga si Rene Empas, 24, taga Gibitnil, lungsod sa Medellin.
Si Senior Inspector Alexander Ancao, hepe sa Tabogon Police Station nga nahinabi sa Banat News mibutyag nga duha ka motorsiklo gipanag-iya nila ni Teofilo Ochea Jr., 31, ug Carlito Rondina, 28, ang nadaro ni Empas.
Matud ni Ancao nga si Empas gikan kini naghatud og harina sa lungsod sa Daan Bantayan ug paingon nang mobalik sa dakbayan sa Sugbo apan giingong nakatulog si Empas sa iyang pagmaneho ug milahos sa waiting shed.
Matud usab ni Ancao nga ang maong lugar estambayanan sa mga habal-habal nga maghuwat og mga pasahero.
Si Ancao midugang nga si Empas mag-atubang kini og kasong reckless imprudence resulting to serious physical injury and damage to property. (BANATNEWS)