CEBU, Philippines - Naukay og kadiyot ang mga bilanggo sa Cebu Provincial Detention and Rehabilitation Center (CPDRC) kagahapon ug usa ka inmate ang nakulatahan sa mga bilanggong miyembro sa Dancing Inmates tungod sa giingong pagbugalbugal niini.
Tungod sa kagubot naalarma ang kapulisan sa Cebu City Police Office (CCPO) nga gipangulohan ni Sr. Supt. Melvin Ramon Buenafe lakip na ang mga sakop sa Special Reaction Unit (SRU) sa Cebu Provincial Police Office (CPPO) ug daling miresponde.
Si Buenafe uban sa iyang mga sakop gikan mitambong sa Charter Day Celebration sa Cebu City Hall miadto sa CPDRC apan wala sila pasudla sa mga gwardiya sa maong bilanggoan tungod kay walay pagtugot sa bag-ong Jail Warden nga si Napoleon Miranda.
Milanat og pipila ka minutos una pa nakasulod sa CPDRC ang mga polis dihang miabot na si Capitol Consultant on Security nga si Jose Marie Gastardo.
Si Gastardo nga nahinabi sa mga tigbalita misalikway sa nanggawas nga report sa mga radio nga dunay nahitabong riot sa sulod sa CPDRC.
Sumala pang Gastardo dunay practice sa mga sakop sa Dancing Inmates nianang tungora alang sa ilang presentasyon karong Sabado.
Apan usa ka Carillo Balueza, 26, nga taga dakbayan sa Carcar nga nag-atubang og kasong frustrated murder nga dili sakop sa mga manayaw maoy giingong nagsugod sa kagubot ug nagsinggit-singgit ug nagbinastos sa mga nag-praktis. Tungod niini napungot ang pipila ka mga miyembro sa mga dancers ug gikuninitan og kulata si Balueza. Sumala pa sa mga tawo diha sa gawas sa CPDRC nakadungog sila og sunod-sunod nga buto diha sa sulod sa maong bilanggoan.
Apan matud ni Gastardo nga dali ra kaayong na-pacify ang maong hitabo ug gipasulod nalang sa ilang mga brigada ang mga nalambigit sa kagubot ug gitabang si Balueza. Hinuon giingong wala na dad-a og tambalanan si Balueza.
Matud ni Gastardo nga gikanselar sa gobernador ang presentasyon karong adlawa gumikan sa komosyon nga nahitabo.Matud ni Gastardo mopahigayon sila og imbestigasyon nganong nakagawas si Balueza sa iyang brigada ug ang giingong report nga nasagpaan kini sa usa sa mga jailguards. ( /EIM) (BANATNEWS)