P50M kinahanglan sa simbahan - Vidal
CEBU, Philippines - Nangandam na ang Archdiocese sa Sugbo alang sa usa sa makasaysayanon ug mahinungdanong panghitabo sa simbahan nga mao ang canonization sa Bisaya nga martir nga si Blessed Pedro Calungsod sa Oktubre 21 didto sa Vatican City, apan kadungan niini ang dakong gastos sa selebrasyon.
Atol sa usa ka press conference kagahapon didto sa iyang pinuy-anan sa Sto.Niño Village sa Brgy.Banilad, si Archbishop Emeritus of Cebu Cardinal Vidal subling mipadayag sa iyang pagmaya tungod kay hapit na ibayaw ang ikaduhang Santos sa nasud nga si Calungsod.
Si Calungsod mao ang ikaduhang Filipino nga nahimong santos sunod ni San Lorenzo Ruiz.
Hinuon, si Vidal nagkanayon nga kinahanglan og dakung salapi ang pagselebrar unya sa Pilipinas sa pagka-santos ni Calungsod nga gibanabanang moabot sa P50 milyones.
Kini aron gamiton sa paglarga sa mga kadagkoan sa simbahan ngadto sa Roma ug sa mga lokal nga kalihukan dinhi sa nasud kalabot sa selebrasyon ilabi na sa himuong dakung Santos nga Misa diha sa South Road Properties (SRP).
“I ask every parish in the diocese to help in raising 50 million,” matud pa ni Vidal. “Mudawat mi gikan sa bisan kinsa as long as it comes from the heart. But I’m optimistic that we can earn such money kay generous ra ba ang mga Cebuanos,” matud pang Vidal.
Dugang usab ni Vidal nga gawas niya ug ni Cebu Archbishop Jose Palma, mokuyug usab ang babaye nga maoy gimilagrohan ni Calungsod nga naayo sa sakit sa kasing-kasing. Si Calungsod usa ka katekista nga nahimong martir didto sa Guam human kini patya sa mga nitibo.Bisan paman sa giagiang pasakit wala siya mobiya sa iyang pagtuo.
Niadtong Marso, 2000, nahimo siyang beato ubos ni Blessed Pope John Paul II. (BANATNEWS)
- Latest
- Trending
